លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ អមដំណើរ តំណាងអាជ្ញាធរខេត្តប៉ៃលិន មន្ទីរពាណិជ្ជកម្មខេត្ត មន្ទីរព័ត៌មានខេត្ត ចៅសង្កាត់ប៉ៃលិន និងមន្រ្តីជំនាញ បានចុះពិនិត្យការប្រមូលផលផ្លែស្វាយកែវរមៀតនៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន។ នៅថ្ងៃទី២៧ខែកុម្ភៈឆ្នាំ២៩២៥ លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទ អមដំណើរ តំណាងអាជ្ញាធរខេត្តប៉ៃលិន មន្ទីរពាណិជ្ជកម្មខេត្ត មន្ទីរព័ត៌មានខេត្ត ចៅសង្កាត់ប៉ៃលិន និងមន្រ្តីជំនាញ បានចុះពិនិត្យការប្រមូលផលផ្លែស្វាយកែវរមៀត និងការកាប់ដើមស្វាយកែវរមៀតចោល ដើម្បីផ្លាស់ប្តូរទៅដាំស្វាយចន្ទីជំនួសវិញ របស់កសិករចំនួន ០២គ្រួសារ រស់នៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន។ • កសិករទី១៖ ឈ្មោះ ហ៊ុយ ពុធ ភេទប្រុស រស់នៅភូមិសួនអំពៅកើត កំពុងប្រមូលផលផ្លែស្វាយកែវរមៀតលើផ្ទៃដីចំនួន ៣ហិកតា ស្មើនឹង ៩០០ដើម។ គាត់បានប្រមូលផលចំនួន ៣ដងរួចហើយ ការប្រមូលផលលើកទី១ បានបរិមាណផលចំនួន ៤០០គ.ក្រ លក់តម្លៃ ១ ០០០រៀល/គ.ក្រ ការប្រមូលផលលើកទី២ បានបរិមាណផលចំនួន ៨០០គ.ក្រ លក់តម្លៃ ៥០០រៀល/គ.ក្រ ការប្រមូលផលលើកទី៣ បានបរិមាណផលចំនួន ១ ០០០គ.ក្រ លក់តម្លៃ ២៥០រៀល/គ.ក្រ ហើយគាត់កំពុងប្រមូលផលជាបន្ត។ • កសិករទី២៖ ឈ្មោះ យិន ណាន ភេទប្រុស (លេខទូរសព្ទ ០៣១ ៥៣ ៣៣៣ ៦៥) រស់នៅភូមិសួនអំពៅកើត គាត់បានសម្រេចចិត្តកាប់ដើមស្វាយកែវរមៀតចោលលើផ្ទៃដីប្រមាណ ១ ហិកតា ស្មើនឹង ២២០ដើម ដើម្បីផ្លាស់ប្តូរទៅដាំ ស្វាយចន្ទីជំនួសវិញ។ គាត់បានបញ្ចាក់មូលហេតុការកាប់ដើមស្វាយកែវរមៀតចោលដោយសារ៖ ចំនួនដើមស្វាយតិចពេក សត្វដង្កូវដួងស៊ីរូងដើមធ្វើឳ្យដើមងាប់ ខ្វះការថែទាំទុកចំការស្វាយចោល ពិសេសគាត់សម្រេចចិត្តផ្លាស់ប្តូរទៅដាំស្វាយចន្ទីជំនួសវិញ ដែលនៅជិតចំការផ្សេងៗទៀតរបស់គាត់ ងាយស្រួលគ្រប់គ្រង និងថែទាំ។ សូមបញ្ជាក់ផងដែរថា៖ អ្នកប្រមូលទិញផ្លែស្វាយកែវរមៀតក្នុងខេត្តប៉ៃលិន រួមទាំងក្រុមហ៊ុន និងអ្នកប្រមូលទិញឯកជន សរុបចំនួន ២៥ កន្លែង។